Eikanger-Bjørsvik Musikklag

Eikanger-Bjørsvik som kjem frå Nordhordland har vore eitt av dei leiande brassbanda i Europa. Stor spennvidde i repertoaret framført med høg musikalsk kvalitet har gjort ensemblet kjend langt utover landegrensene.

Dei siste åra har Eikanger-Bjørsvik tatt nye steg framover. Ensemblet har fått ein plass i festivalar som aldri før har prioritert korps: I 2002 framførte dei "Lux Aeterna" med dansekompaniet Carte Blanche under Festspillene i Bergen. Balletten av Jo Strømgren var opningsforestilling i festivalen og fekk særs gode kritikkar. Framsyninga var òg sett opp i Sandnes i Rogaland og under Olavsdagene i Trondheim same år. Eikanger-Bjørsvik har i seinare år vore på programmet i Vossajazz, Autunnalen – festival for ny musikk, Dei Nynorske Festspela, Mediefestivalen i Bergen og Saddleworth Festival of Music and Arts.

I 2003 ga Eikanger-Bjørsvik ut cd-en "Art of the States", i 2005 "Tales & Stories". Det var den 11. og 12. plateinnspelinga i korpset si historie og var milepælar: For første gong var all musikken arrangert og tilrettelagd av medlemer i korpset sjølv, arrangert av EBML-musikarane Frode Rydland, Svein H. Giske og EBML-dirigent Reid Gilje. I 2006 ga EBML ut "20 Supreme Years" med Howard Snell og "Chatham Dances" med Elgar Howarth.

Forutan Norge har korpset turnert i England, Skottland, Wales, Danmark, Sveits, Nederland og Belgia. Nye turnear er under planleggjing.

Eikanger-Bjørsvik er det meistvinnande brassbandet i Norge. 9 NM-titlar, 2 EM-titlar, 12 sigrar i underhaldningskonkurransen Siddis Brass, 2 triumfar i TV-konkurransen Resonans har ensemblet bokført.

Eikanger-Bjørsvik engasjerer seg sterkt i korpsrørsla i Nordhordland. Dei aller fleste skulekorps i området har dirigentar som er knytt til EBML. Kvar sommar inviterer Eikanger-Bjørsvik skulekorpsungdom til Feriespel, tre dagar med undervisning, leik og moro. Ved siste samling var meir enn 70 musikantar på plass.