Rekordmange vil delta på NM

Fristen for å melde seg på til NM janitsjar og NM Brass gjekk ut 15.september. Og rekordmange korps vil til NM i Trondheim. Heile 99 korps har meldt seg på. Til NM i Bergen har så langt 78 korps meldt sin ankomst, og det er også fleire enn i fjor.

På NM janitsjar i fjor deltok 98 korps med over 4300 medlemmer. Og i år kjem det enno fleire.

- Vi har booka alle hotella i byn, seier prosjektleiar Håvard Hinsverk. NM janitsjar veks og hotella i byn utvidar. For tida er skandinavias største hotell under bygging på havna i Trondheim, og vi har reservert alt, seier han.  

Lottodivisjonen var ny av året i fjor og korpsa som deltok konkurrerte om å vinne pengepremiar frå Norsk Tipping. 

Nyvinninga var eit samarbeid mellom Norges Musikkorps Forbund og Norsk Tipping. Og tanken bak var nettopp å gjere noko for dei korpsa som ikkje ønskjer ein så alvorsprega konkurranse.

- Det er gledeleg at mange som deltok i Lottodivisjonen i fjor oppdaga kvalitetane i norgesmeisterskapen og har meldt seg på for å vere med å konkurrere i år, seier prosjektleiar Håvard Hinsverk. Heile 18 korps har meldt seg på i den nedste divisjonen, 6.divisjon.

- Lottodivisjonen er mykje av grunnen til den store auken i tal påmeldte til NM janitsjar, 10 fleire enn i fjor, seier Hinsverk.

Om det blir Lottodivisjon til neste år, er enno ikkje bestemt.

NM brass i Bergen har også fleire påmeldte til NM 2012. I fjor var det for mange korps med i 4.divisjon. 23 korps blir for mange i ein divisjon og difor er det oppretta ein 5.divisjon i 2012. Prosjektleiar Åse Espevik seier planlegginga av NM brass er i rute så langt.